【職業舉牌師奇遇（上篇）：最諷刺嘅貧富懸殊畫面】
疫情之下冇咩好做，本身失業、Freelance cut得就cut、傾n單合作傾傾吓又會突然「冇budget」，已經習慣曬，無聊之下又去做吓炒散，今次係做「職業舉牌師」。
話說曾經有一期我係「職業舉牌師」，你唔好理舉嚟為乜，我唔知，總之舉住個牌八至十個鐘，個腦完全放空。真心呢樣嘢唔係易做，要頂得順悶同累，又要頂得順極凍或極熱－－叫你舉得牌唔係食正冷氣位就係日曬雨淋啦！
喺香港做「職業舉牌師」人哋覺得你無鬼聊，當年喺澳洲我不知幾想做，講緊係公路「職業舉牌師」，即係整路封一條線舉「Go」「Stop」果啲，男好女好，好多時都型到震、而人工隨時高過你香港做會計師。
不過，今時今日要做各類炒散都唔係易。想當年有工冇人做，依家一個job一出，可以三秒之內唔報就full。以前出55蚊搵鬼做，今時今日45蚊都係三秒即full，甚至見過有40蚊都爭崩頭。當我成日話失業率高企冇人信時，見到呢啲情況，都依然果句，我唔覺失業率係6.X%，係6X%。
以前返呢啲工，自己係全場最老果個，點知今日幾乎係全場最後生果個，反差之大都幾愕然。返得呢啲工預咗大家圍爐，以前最多就係鬱鬱不得志後生追夢者頂硬上；今日講緊係大家鬥失業失得耐咁，有個慘到申請埋破產、有個自己公司執笠搵唔到工但要養家... 總之返得呢啲工預咗乜人都有，有好多騎呢怪，但更多係咬緊牙關默默活下去嘅人，然後你又覺得自己都唔係咁差。
對上一次返呢啲濕鳩工都係兩年前嘅事，眨下眼就兩年。你返正職可能同事嗌個deliveroo lunch都成舊水－－真心我唔明點解lunch要食咁貴，而你唔跟同事食百幾蚊lunch人哋會覺得你扮高鬥，其實我真係覺得冇必要食咁貴。喺某個平行時空，呢班人會係50蚊食個lunch都覺得太貴。呢單job話咗包飯，點知因為限聚令唔包得飯－－唔俾一班人圍埋一齊食喎，又係多餘嘅，肚餓嘈得嚟我都食咗啦。
點知呢次堅群情洶湧，紛紛怒屌50蚊食個lunch點俾得起呀？嘢飲仲要加3蚊，3蚊我搭到半程車喇！我食得起lunch就唔會返呢份工啦，我為咗你包飯咋！成班人係咁鬧。我明白呢個係原則問題，但講真50蚊咁上下啦？點知，大家真係會俾唔起50蚊食個飯。
今日嘅我唔會折墮到咁，但見呢班人嬲到喊咗出嚟，諗返起以前嘅我。
飯盒，對好多人嚟講，係一份尊嚴。返份正職會有好多更值得你爭取嘅嘢，但對一班貧窮線下嘅人，做人已經冇尊嚴冇人生，飯盒，對佢哋嚟講就係最基本嘅尊嚴。我明，我受過。
諗返以前喺澳洲最窮日子，喺餐廳返工就係為咗個飯盒，人做得幾辛苦無非都係為兩餐，有錢你可以追夢可以去搵興趣玩呢樣果樣，可以炒股投資錢搵錢，但冇錢唔好講咁多嘢，只求最基本溫飽活下去。好記得當年我返第一日勁辛苦，然後拎到個飯盒，都咬緊牙關頂落去，望住個飯盒真係喊咗出嚟。嚟到香港，好多人一樣只係為個飯盒而活，當你哋喺度大魚大肉時，冇諗過有人為慳幾十蚊飯盒要咁樣。
返呢啲工其實冇咩壓力，最大壓力係你個腦可唔可以完全放空、你個人又頂唔頂得到悶，喺我思潮望住班有錢人行來行去，已經飄咗去外太空時，聽住呢班萍水相逢嘅人喺度呻最近過得幾慘、幾難先搶到份炒散，望住身處嘅豪宅地段，食個lunch都要三位數、個個WFH又可以無聊到拖住隻狗曬太陽、正對無敵海景，又有冇人留意到社會上有咁嘅人存在？
呢個環境，喺豪宅群入面因為冇飯盒而嘈，極諷刺。當大家最終都係自己食，有人會覺得附近最快最平、上Donki買串熱食頂過lunch已經接受唔到時，同時又聽到有人講緊日本士多啤梨特價百幾蚊盒好抵；當大家曬到就中暑，但最近汽水機8蚊一罐可樂都買唔起時，有班闊太傾緊買咩好嘢俾隻狗食，完完全全同一條街兩個平行時空。我哋作為社會低下階層果班，無遮無掩無break又企又曬八個鐘，大家屌兩句捱過咗，但出爾反爾有飯盒變冇飯盒，反而係忍唔到。
呢啲工其中一樣好就係，你唔駛怕是非唔驚有邊個跣你，有咩可以好麻甩講句：「師兄／師姐幫手頂一頂，我去揸揸水先！」同事中暑暈咗堅會大家衝埋去幫手，而唔係恥笑你踩多一腳。聽大家鬧冇飯盒鬧足大半日，然後又講吓自己嘢－－呢啲job最易講到好deep心底話，你唔好理真定假，其實大家都係搵個樹窿呻吓壓抑嘅苦，收工前圍爐睇日落等收工，其實又幾好feel嘅。
最浪漫嘅係，臨走果陣「師兄／師姐，辛苦曬，nice to meet you!」然後，你發現連對方咩名都唔知。
貧富懸殊喺呢個環境最能體現，但富者點樣影響到下一代，我呢兩日見識另一單故事更誇張，下文再講。
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【MeWe請Follow】：mewe.com/p/travelerwithmovie
【IG請follow】www.instagram.com/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
Search